Повлекувањето на храна од пазарот (food recall) е мерка што се презема за да се заштитат потрошувачите кога постои сомнеж дека одреден производ може да претставува ризик за здравјето. Иако ваквите случаи не се секојдневни, важно е да знаеме како да постапиме доколку производ што го имаме дома е предмет на повлекување.
Зошто се повлекува храна?
Прехранбените производи можат да бидат повлечени од различни причини. Најчесто станува збор за погрешно означување на производот, присуство на алергени кои не се наведени на етикетата, микробиолошка контаминација или можност производот да предизвика заболување кај потрошувачите.
Примери за вакви ситуации се сладолед што содржи неозначени јаткасти плодови, сирење контаминирано со бактерии од родот Listeria, јајца поврзани со појава на Salmonella или зеленчук контаминиран со патогени видови на Escherichia coli.
Епидемија предизвикана од храна се смета дека постои кога две или повеќе лица ќе се разболат по консумирање на иста контаминирана храна или пијалак.
Како да постапиме ако имаме производ што е повлечен?
Најпрво, внимателно проверете дали производот што го поседувате се совпаѓа со информациите наведени во известувањето за повлекување. Обрнете внимание на брендот, називот на производот, бројот на серијата и рокот на употреба.
Доколку производот е дел од повлекувањето, не треба да се консумира. Во зависност од упатствата на производителот или надлежните институции, производот може да се врати на местото на купување за поврат на средства или безбедно да се отстрани.
Не заборавајте дека ризикот не завршува само со отстранување на производот. Доколку храната била чувана во фрижидер, замрзнувач или оставена на работна површина, потребно е темелно чистење на сите површини, полици, садови и прибор што можеле да дојдат во контакт со неа.
Кои лица се изложени на поголем ризик?
Иако контаминираната храна може да предизвика заболување кај секого, одредени групи на луѓе имаат значително поголем ризик од развој на сериозни компликации.Во оваа група спаѓаат: бремени жени, мали деца, постари лица, лица со ослабен имунолошки систем, лица со хронични заболувања, како што е дијабетесот и пациенти со ХИВ/СИДА или лица кои примиле трансплантација на органи. За овие категории на население особено е важно да избегнуваат високоризична храна, како што се непастеризирано млеко и млечни производи, недоволно термички обработено месо, риба и јајца, готови салати и сурови никулци.
Како да останеме информирани?
Најдобар начин за заштита е редовното следење на официјалните известувања од надлежните институции за безбедност на храната и јавното здравје.
Покрај тоа, секогаш е препорачливо да се применуваат основните правила за безбедно ракување со храната:
- редовно миење на рацете пред и по подготовка на храна
- темелна термичка обработка на храната
- правилно складирање на производите
- избегнување на вкрстена контаминација помеѓу сурова и готова храна
Брза реакција значи поголема безбедност
Повлекувањата на храна се важен механизам за заштита на јавното здравје. Навременото препознавање на ризичниот производ, неговото отстранување и почитувањето на препораките од надлежните институции можат значително да го намалат ризикот од заболување и да помогнат во заштитата на нашето здравје и здравјето на нашето семејство.
